डेंगु रोग नियन्त्रणमा सरकारले ध्यान नदिएको भन्दै गर्जिए सांसद

Posted on: २२ भाद्र २०७६, आईतवार

काठमाडौँ, भदौ २२ — पछिल्लो समय देशका ४८ जिल्लामा भेटिइसकिएको डेंगु रोग ‘प्रकोप’का रुपमा फैलिँदै जाँदा रोग नियन्त्रण गर्न स्वास्थ्य तथा जनसङ्ख्या मन्त्रालय गम्भीर बन्न नसकेको भन्दै सांसदहरुले सरकारको ध्यानाकर्षण गराएका छन् । प्रतिनिधिसभाको आइतबारको बैककको शून्य समयमा सांसदहरुले रोग नियन्त्रणमा मन्त्रालयको प्रयासका बारेमा मन्त्रीले सदनमा जानकारी दिन निर्देश गर्न सभामुखसित आग्रह गरे। सांसद कृष्णगोपाल श्रेष्ठले आइतबार काठमाडौंको नयाँ सडक निवासी ७६ वर्षीया एक वृद्धाको डेंगु रोगका कारण निधन हुनपुगेको जानकारी गराए।

सांसद डिला सङ्ग्रौलाले देशका ४८ जिल्लामा फैलिएको डेंगु नियन्त्रण गर्न स्वास्थ्य तथा जनसङ्ख्या मन्त्रालय असफल रहेको आरोप लगाउँदै डेंगु रोगका बारेमा मन्त्रीले दिएका सार्वजनिक भनाइ आपत्तिजनक रहेको बताइन्। उनको प्रश्न गरिन्, “डेंगु नियन्त्रण गर्ने काम नेपाली सेनाको होरु के सेना परिचालन गर्न मिल्छरु”

सांसद पुष्पा भुषाल काठमाडौंमा नै प्रकोपका रुपमा फैलिएको डेंगु नियन्त्रण गर्न सरकार असफल बनेको बताइन्। सांसद नरमाया ढकालले काठमाडौँ उपत्यकालगायत देशका अधिकांश जिल्लामा फैलिएको डेंगु नियन्त्रण भएका प्रयास बारेमा स्वास्थ्यमन्त्रीले सदनमा जानकारी गराउनुपर्ने माग गरिन्।

मन्त्रालयका अनुसार पछिल्लो समय सो रोग ४८ जिल्लामा फैलिएको, ३ हजारभन्दा बढी सङ्क्रमित हुन पुगेका र ४ जनाको अकालमा मृत्यु भएको तथ्याङ्क रहेको छ। मन्त्रालयले विशेषगरी किटजन्य रोग नियन्त्रण गर्ने पद ‘भेट्रोल कन्ट्रोलर’ खारेज गरेपछि रोग नियन्त्रण गर्न कठिनाई परेको जनाइएको छ।

शून्य समयमा विद्यालय जान लागिरहेकी १५ वर्षीया छात्रा मुस्कान खातुनमाथि शुक्रबार वीरगञ्जमा भएको आक्रमणको भर्त्सना गर्दै उनले काठमाडौंस्थित कीर्तिपुरमा उपचारत खातुनलाई निःशुल्क उपचारको व्यवस्था मिलाउन र एशिड प्रहार गर्नेमाथि कडा कारवाही गराउन पनि सांसदहरुले सरकारको ध्यानाकर्षणसमेत गराए। सांसद कृष्णगोपाल श्रेष्ठ र पार्वती डिसी चौधरीले कीर्तिपुरमा उपचारत् खातुनको निःशुःल्क उपचारको व्यवस्था गर्न माग गरे।

बैठकमा सांसद टेकबहादुर बस्नेतले असार मसान्तमा नै खर्च गर्ने प्रवृत्ति कानुनले अन्त्य गरे पनि व्यवहारिकरुपमा अन्त्य नभएकोतर्फ अर्थ मन्त्रालयको ध्यानाकर्षण गराए। अर्का सांसद तेजुलाल चौधरीले धान रोप्ने समयमा तराईरमधेसमा बाढी ढुवान भयो अहिले सुख्खाग्रस्त भएको छ, यस्तो अवस्थामा सङ्घीय सरकारले ध्यान दिन आग्रह गरे।

सांसद दामोदर भण्डारीले बैतडी जिल्लाका ३ पालिकामध्ये शिवनाथ गाउँपालिकामा हिंस्रक बाघको आतङ्क भएकाले नियन्त्रणको लागि माग गरे। दिलकुमारीले महिला माथि हुने हिंसा अन्त्य गर्न सरकारले विशेष कार्ययोजना ल्याउन र शुक्रबार वीरगञ्जका किशोरी मुस्कान खातुनमाथि एसिड प्रहार गर्नेलाई कडा कारवाही गर्न सरकारको ध्यानाकर्षण गराए।

सांसद देवप्रसाद गुरुङले एनसेलको लाभकरका विषयमा भएको आदेशमाथि सरकारले पुनरावलोकन गर्न माग गरे। अर्का सांसद देवप्रसाद तिमल्सिनाले कृषकले उत्पादन गरेका ऊखुको मूल्य नपाएको चर्चा गर्दै ऊखुको मूल्य नदिने उद्योगमाथि कारवाही गर्न माग गरे।
सांसद देवेन्द्र पौडेलले उत्तरगङ्गा जलाशय आयोजना कार्यान्वयन गर्न सरकारले पहिलो प्राथमिकता दिन माग गरे। सांसद देवेन्द्रराज कँडेलले नवलपरासी जिल्लामा हालै विभत्सरुपमा गाईको मृत्यु भएकोतर्फ ध्यानाकर्षण गराउँदै हत्या गर्नेमाथि कारवाही गर्न माग गरे। अर्का सांसद नवीना लामाले समानुपातिक र प्रत्यक्ष निर्वाचित सांसदबीच विभेद नगर्न सरकारको ध्यानाकर्षण गराइन्।

सांसद नवराज रावतले सात जिल्लामा डिभिजन वन कार्यालय स्थापना गर्ने निर्णयलाई कार्यान्वयनमा ल्याउन माग गरे भने नारायणप्रसाद खतिवडाले पूर्वाधारका काम अति सुस्त हुने तर ठेकेदारलाई भुक्तानी छिटो हुने प्रवृत्ति रोकिनुपर्छ भने। सांसद पद्मनारायण चौधरी सिराहा र सप्तरीलाई खडेरीग्रस्त घोषणा गर्न, डेंगु नियन्त्रणमा ध्यान दिन र उदयपुर र सिराह जिल्लाको सीमा विवाद अन्त्य गर्न माग गरे।
कान्तिपुर बाट

Comments

comments