नवौं गैरआवासीय नेपाली विश्व सम्मेलन काठमाडौंमा मंगलबारदेखि शुरु

Posted on: २८ आश्विन २०७६, मंगलवार

२८ असोज, काठमाडौँ । नवौं गैरआवासीय नेपाली विश्व सम्मेलन काठमाडौंमा आजदेखि शुरु भएको छ । तीन दिनसम्म चल्ने सम्मेलनको राष्ट्रपति विद्यादेवी भण्डारीले उद्घाटन गरेकी छन् । सम्मेलनलाई सम्बोधन गर्दै राष्ट्रपति भण्डारीले देशको विकास र समृद्धिमा योगदान गरेकामा एनआरएनको प्रशंसा गरिन् । ‘विश्वभर छरिएका नेपालीले स्वःस्फूर्त रूपमा गरेको सहयोग देशका लागि महत्वपूर्ण छ । पूर्वाधार विकास तथा लोककल्याणमा गरेको सहयोगको निरन्तरताको अपेक्षा नेपालले गरेको छ ।’ राष्ट्रपति भण्डारीले भनिन् ।

उनले भनिन्, ‘गैरआवासीय नेपालीलाई नागरिकता प्रदान गर्ने व्यवस्था संविधानमा छ । सो व्यवस्था चाँडोभन्दा चाँडो कार्यान्वयन गरिने छ ।’कार्यक्रममा परराष्ट्रमन्त्री प्रदीपकुमार ज्ञवालीले उच्च आर्थिक वृद्धिको दिशामा मुलुक अघि बढेकाले त्यसलाई सघाउन गैरआवासीय नेपालीलाई आग्रह गरे । सरकारको भौतिक उपस्थितिभन्दा गैरआवासीय संघको उपस्थित बढी देशमा रहेको भन्दै उनले राज्यको दायित्वमा साथ दिने गरेकामा आभार पनि व्यक्त गरे ।

अध्यक्षका लागि कुमार पन्त र कुल आचार्य प्रतिष्पर्धामा छन् । पदाधिकारीसहितका अरु पदमा पनि दर्जनौं उम्मेदवार प्रतिष्पर्धामा छन् । सम्मेलनमा ८१ मुलुकका गैरआवासीय नेपाली प्रतिनिधि सहभागि हुनेछन् ।

Comments

comments